404
نعتذر , لا نستطيع ايجاد الصفحة المطلوبة
  • العودة الى الصفحة الرئيسية
  • الاثنين، 17 أبريل 2017

    10 غلطات في العناية بالبشرة بتزود مشكلة حب الشباب وبتخليه اسوأ وازاي تتجنبيها

    10 غلطات في العناية بالبشرة بتزود مشكلة حب الشباب وبتخليه اسوأ وازاي تتجنبيها



    كلنا اكيد بنتمنى ان بشرتنا تبقى صافية وخالية من العيوب وخصوصا حب الشباب اللي بيعاني منه كتير من البنات, ولكن اللي احنا منعرفوش ان ممكن نكون بنمارس عادات يومية ممكن تضر بشرتنا وتزود مشكلة حب الشباب, والنهاردة هنقول لكل بنات حوا اكتر غلطات في العناية بالبشرة ممكن تزود مشكلة حب الشباب وهنعرف مع بعض ازاي تتجنبيها.












    غلطات في العناية بالبشرة:





    1- تقشير البشرة زيادة عن اللزوم:





    استخدام المقشرات القوية على البشرة او ادوات التنضيف القاسية زي الليفة ممكن يزود مشكلة حب الشباب, لان دعك البشرة وتقشيرها بشكل قاسي او مبالغ فيه ممكن يسبب تهيج البشرة وتزود حب الشباب وتخلي علاجه صعب.





    الحل: ابعدي عن المقشرات القوية وادوات التنضيف القاسية او الخشنة واستخدمي مقشرات خفيفة على البشرة من مرتين لتلات مرات في الاسبوع, دلكي بشرتك باطراف الصوابع  بالراحة بحركات دائرية او ممكن تستخدمي فرشة التقشير لانها بتساعد على تنضيف المسام من غير ما تسبب تهيج للجلد.













    2- بتحطي علاج حب الشباب على البثور بس:





    اغلبنا تقريبا بنحط كريمات او مراهم حب الشباب على الحبوب بس لكن ادوية حب الشباب عموما مش بس بتعالج البثور الموجودة كمان من وظيفتها انها بتمنع البثور الجديدة.





    الحل: عشان تحافظي على بشرة نقية وخالية من الحبوب حطي طبقة رقيقة من علاج حب الشباب على البشرة كلها عشان تعالج البثور الموجودة وتمنع تكون بثور جديدة على البشرة “واختاري الكريمات اللي بتحتوي على البنزويل بيروكسايد لانها بتساعد على قتل البكتيريا”.





    3- الضغط على البثور:





    من اسوأ العادات اللي بنعملها اننا نضغط على البثور وبنفتكر ان ده بيسرع من انها تختفي لكن ده غلط جدا لان الضغط عليها هينشر العدوى للمناطق اللي جنبها وهيزودلك المشكلة ومش بس كده كمان هيسيب ندوب واثار على البشرة هيبقى صعب علاجها.





    الحل: استخدمي علاج حب الشباب على البثور من غير ما تلمسيها بايدك خالص.














    4- مش بتشطفي وشك كويس وانتي بتغسليه:





    وانتي بتغسلي وشك سواء بصابون طبي او بغسول او ايا كان اللي انتي بتستخدميه لو مشطفتيش الوش كويس منه بالمية ده ممكن يسبب تهيج للبشرة.





    الحل: اتأكدي انك تشطفي وشك كويس جدا بالمية من اي بقايا صابون او غسول, وتقريبا 30 ثانية هتكون كافية لتنضيف الوش كويس.





    5- مش بتحطي واقي الشمس:





    كتير من البنات بيهملوا واقي الشمس, لكن استخدامه مهم جدا عشان نحمي بشرتنا حتى لو الدنيا مغيمة بردو حطي الواقي لان الاشعة بتخترق الجلد حتى وانتي في الضل, واشعة الشمس من اكتر الحاجات المضرة للبشرة اللي ممكن تسبب تغيير ملمس ولون الجلد والتجاعيد والخطوط الرفيعة وممكن تسبب في المستقبل سرطان الجلد, وحروق الشمس بتزود مشكلة البثور وحب الشباب لان البشرة بتتفاعل مع تأثير الجفاف اللي بتسببه اشعة الشمس على البشرة وبتنتج دهون اكتر وبالتالي ده بيزود حب الشباب.





    الحل: استخدمي واقي الشمس قبل الخروج, او انواع الكريمات المرطبة اللي بتحتوي على عامل حماية من الشمس ميقلش عن 15 او اكتر.





    6- الاستخدام الغير منتظم لادوية حب الشباب:





    ادوية حب الشباب هتبقى غير فعالة لو استخدمتيها من مرتين لتلات مرات بس في الاسبوع, وفي نفس الوقت انك تحاولي تعوضي ده بانك تحطي كمية كبيرة من العلاج كل مرة ده ممكن يسبب تهيج وتلف الجلد, وهيسبب احمرار وجفاف البشرة, بالاضافة لده ان الطريقة دي مش هتسرع عملية شفاء البثور لان الجلد بيمتص كمية معينة من المكونات النشطة في المنتج بغض النظر عن الكمية اللي بتطبقيها على البشرة.





    الحل: فعالية ادوية حب الشباب بتستمر على البشرة تقريبا من 6 – 12 ساعة وبعد الوقت ده المفروض انك تحطي تاني, يعني هتطبقيه على البشرة من مرتين لتلات مرات في اليوم.





    7- مش بتستخدمي مرطب لو بشرتك دهنية:





    لو بشرتك دهنية او بتفرز زيوت كتير ده مش معناه انك تتجنبي الكريم المرطب, لان الجلد بعد غسيله بيتعرض لنسبة من الجفاف نتيجة التنضيف, لان تقريبا كل انواع المنظفات بتاخد من رطوبة الجلد.





    الحل: استخدمي نوع كريم مرطب خفيف مناسب لبشرتك الدهنية.





    8- التدخين:





    التدخين من العادات السيئة جدا اللي ممكن تزود مشكلة حب الشباب لان النيكوتين بيأثر على الاوعية الدموية بما فيها الاوعية اللي بتغذي البشرة ونتيجة لده الجلد بيتحرم من التغذية السليمة اللي لزماه.





    الحل: حاولي انك تبعدي عن التدخين عشان تحافظي على بشرتك صحية.





    9- جفاف بشرة الجسم:





    استخدام المية السخنة اوي على الجسم او تفضلي في المية لفترة طويلة ده ممكن يسبب جفاف بشرة الجسم لان البشرة بتفقد المكونات الحيوية اللي بتساعد على الاحتفاظ بالرطوبة في الجلد.





    الحل: استخدمي مية دافية متكونش سخنة اوي, ومتطوليش في الشاور بتاعك وتقعدي تحت المية زيادة عن اللزوم يعني كحد اقصى 15 دقيقة, استخدمي منظف لطيف على البشرة زي نيتروجينا Rainbath Refreshing Shower and Body Gel.





    10- تجفيف البشرة زيادة عن اللزوم:





    استخدام انواع غسول او صابون قوية عشان نجفف البشرة ونمنع افراز الزيوت ده بيخلي الجلد يفقد مرونتة ويزود من خطر تهيج الجلد والعدوى.





    الحل: استخدمي دايما منظف معتدل ولطيف على البشرة وبعدها حطي علاج حب الشباب اللي مش بيسبب جفاف البشرة زيادة عن اللزوم وبيحتوي على نسب منخفضة من حمض الصفصاف او السلساليك والبنزويل بيروكسيد.





    -

    -

    طعم البيوت مدونة متخصصة لحواء من حيث الطبخ والموضة والاناقة والجمال والمكياج واطلالات المشاهير والاكسسوارت الحريمي والاثاث والديكور وصحة الاطفال وصحة المرأة العربية

    الكاتب : طعم البيوت

    ليست هناك تعليقات:

    إرسال تعليق

    جميع الحقوق محفوظة ل طعم البيوت -